განსხვავებული და ლამაზი ფორმის სტალაგმიტებით, სტალაგნატებითა და სტალაქტიტებით გამორჩეული 250 მეტრის სიგრძის ორსართულიანი და 4 დარბაზიანი მღვიმეა. მღვიმე შესასვლელიდან 30-ე მეტრზე ორად იყოფა. მეორე სართული პატარა საფეხურებით დაკავშირებულია დარბაზთან. მღვიმეს გასასვლელი არა აქვს, ამოკეტილია სტალაგნატით, რომლის სისქე 7 მეტრია. 

მდებარეობა: თერჯოლის მუნიციპალიტეტი, სოფ. ნავენახევის მიდამოები, 320 მეტრი ზღვის დონიდან.

კოორდინატები: N42 14.507 E42 51.783

მისასვლელი გზა: ბუნების ძეგლთან ყველაზე ახლომდებარე მსხვილი დასახლებული პუნქტია ქ. ქუთაისი. თბილისიდან ქუთაისი დაშორებულია 230 კმ-ით; ხანგრძლივობა - 3 სთ;
ქ. თბილისი - ქ. ქუთაისის ცენტრალური ავტომაგისტრალი - ნავენახევის მღვიმის ბუნების ძეგლი 7 კმ. ხანგრძლივობა - 15 წთ.

საკონტაქტო ინფორმაცია: 
ტელ: 577 10 14 17
ელ-ფოსტა:  [email protected] 

ოკრიბა-არგვეთის ქედში,უროგენულ კირქვებში გამომუშავებულ ცუცხვათის მღვიმოვანს, ადგილობრივები „მაღარას“ უწოდებენ.
მღვიმე შედგება 13 სართულისგან. ქვევიდან პირველი სართული ადამიანისთვის გაუვალი ვიწრო ხვრელია, რომელშიც გაედინება მუდმივი ნაკადი - მდ. შაბათაღელე. მღვიმის ქვემოთ მდინარეს ჭიშურა ეწოდება.
მეორე სართული (მთავარი ტალანი) ატარებს უზარმაზარი ბუნებრივი გვირაბის ხასიათს (სიგრძე - 200 მ, სიგანე - 10-30 მ, სიმაღლე 10-28 მ). მასში წყალი მხოლოდ შაბათაღელის წყალდიდობის დროს გაედინება. ტალანის განშტოებებში არის წყაროები, პატარა ტბა, კალციტის ნაწვეთი ფორმები. ჭერთან შენახულია ადამიანის მიერ დამაგრებული ძელები - ძველი საკულტო ნაგებობის ნაშთი.
მეოთხე სართულიდან დაწყებული და უფრო ზევით მღვიმეები უწყლოა. მათში ნაპოვნია არქეოლოგიური ძეგლები შუა პალეოლითიდან (მუსტიეს ეპოქიდან) ბრინჯაოს ხანამდე და ისტორიულ ეპოქამდე, ცხოველთა ორმოცამდე სახეობის ძვლები. განსაკუთრებით ყურადღებას იპყრობს: 1. ბრინჯაოს მღვიმე (V სართული), რომლის ნაფენთა საერთო სიმძლავრე 12-13 მეტრს აღწევს; მათში აღბეჭდილია უკანასკნელი 140 000 წლის განმავლობაში მომხდარი კლიმატური ცვლილებები; 2. ზედა მღვიმე (XI სართული), სადაც აღმოჩენილი იქნა პირველყოფილი საკულტო საგნები: საგანგებოდ დალაგებული მღვიმური დათვის თავის ქალები, ბარძაყის ძვლები და კბილები, მსხვერპლად შეწირული სხვა ცხოველთა ძვლები; 3. ქარაფში გახსნილი სამი მღვიმე (მოაჯირიანი, ღამურებისა და დათვის - VII-IX სართულები), რომლებიც ატარებენ ფეოდალიზმის ხანაში სიმაგრეებად გამოყენების ნიშნებს - შენახულია ქვითკირის კედლები, გამოჭრილი საფეხურები, ქვევრების ნატეხები. აქვე ღამურების დიდი კოლონიაა.
თავისი სიძველითა და სართულების რაოდენობით ცუცხვათის მღვიმოვანი ერთ-ერთი პირველია მსოფლიოში.

მდებარეობა: ტყიბულის მუნიციპალიტეტი, სოფ. ცუცხვათის სამხრეთით, მდ. ჭიშურას ხეობა, 320 მეტრი ზღვის დონიდან.

კოორდინატები: N42 16.249 E42 51.165

მისასვლელი გზა: ბუნების ძეგლთან ყველაზე ახლომდებარე მსხვილი დასახლებული პუნქტია ქ. ქუთაისი. თბილისიდან ქუთაისი დაშორებულია 230 კმ-ით; ხანგრძლივობა - 3 სთ;
ქ. ქუთაისი - სოფ. ცუცხვათი - 24,3 კმ, ხანგრძლივობა - 40 წთ;
სოფ. ცუცხვათი - ცუცხვათის მღვიმოვანის ბუნების ძეგლი - 3 კმ, ხანგრძლივობა - 40 წთ.

საკონტაქტო ინფორმაცია:
ტელ: 5577 10 14 17
ელ-ფოსტა:  [email protected] 

ღირშესანიშნაობა: 60-70 მ სიმაღლის სამსაფეხურიანი ჩანჩქერი გადმოედინება აღმოსავლეთ ექსპოზიციის ფერდობზე მდებარე მღვიმიდან. მღვიმეში ერთი პატარა და ერთი დიდი ტბაა. ჩანჩქერის ნაპირები დაფარულია შერეული ფართოფოთლოვანი ტყით. აქ მრავალი ენდემური ცხოველი ბინადრობს, კერძოდ: კავკასიური თხუნელა, რადეს, ვოლნუხინის და კავკასიური წყლის ბიგები.

მდებარეობა: ტყიბულის მუნიციპალიტეტი, სოფ. მუხურას მიდამოები, ტყიბული-მუხურას საავტომობილო გზის სიახლოვეს, 886 მეტრი ზღვის დონიდან.

კოორდინატები: N42 19.582 E43 02.947

მისასვლელი გზა: ბუნების ძეგლთან ყველაზე ახლომდებარე მსხვილი დასახლებული პუნქტია ქ. ტყიბული. თბილისიდან ტყიბული დაშორებულია 236 კმ-ით; ხანგრძლივობა - 3 სთ;

ქ. ტყიბული - მუხურას ჩანჩქერის ბუნების ძეგლი  - 8,5 კმ; ხანგრძლივობა - 15 წთ;

დამატებითი ინფორმაციისთვის დაგვიკავშირდით: 595 08 60 59

ღირშესანიშნაობა: ბუნების ძეგლი საქართველოში თავისი პარამეტრებით ერთ-ერთი გამორჩეული, მეოტურ კონგლომერატებში გამომუშავებული უდიდესი კლასტოკარსტული და ფსედოკარსტული 600 მ სიგრძის მღვიმეა.

მღვიმე იხსნება შესასვლელი დარბაზით, რომელიც წარმოადგენს სუბჰორიზონტული განტოტვილი ტალანის (გვირაბის) ბოლო ნაწილს. მთავარი ტალანის ფსკერში ჩაჭრილი ეროზიული კანიონით მოზრდილი ცივი მიწისქვეშა მდინარე გაედინება. კანიონის სიღრმე ზოგან 7-8 მეტრს აღწევს. მთავარ ტალანს გამოეყოფა ორი შტო, რომლებიც მასთან შედარებით უფრო ვიწრო და მოკლეა. ერთ-ერთი ტალანი გამჭოლია და ზემო ბოლოთი სამზეოზე გადის. მღვიმესა და მის მიმდებარე ტერიტორიაზე ზაფხულობით გვხვდება ხელფრთიანები.

მდებარეობა: ჩხოროწყუს მუნიციპალიტეტი, სოფ.  ახუთის(ლემამფორე) მიდამოები, მდ. ზანას ხეობა, 290 მეტრი ზღვის დონიდან. 

კოორდინატები: N42 30.365 E42 13.272

მისასვლელი გზა: ბუნების ძეგლთან ყველაზე ახლომდებარე მსხვილი დასახლებული პუნქტია დ. ჩხოროწყუ. თბილისიდან ჩხოროწყუ დაშორებულია 334 კმ-ით; ხანგრძლივობა - 4 სთ და 30 წთ;

დ. ჩხოროწუ - სოფ. ახუთი - 12.5 კმ,  ხანგრძლივობა - 30 წთ;

სოფ. ახუთი - ნაზოდელავოს მღვიმის ბუნების ძეგლი  - 6,8 კმ; ხანგრძლივობა - 30 წთ;  

დამატებითი ინფორმაციისთვის დაგვიკავშირდით: 595 08 60 59

გელათის სამონასტრო კომპლექსი- XII საუკუნის გელათის სამონასტრო კომპლექსი მდებარეობს ტყიბულის მუნიციპალიტეტი, სოფ. გელათში. ძეგლი იუნესკოს (UNESCO) მიერ არის დაცული, როგორც მსოფლიო მემკვიდრეობის უბანი. მისასვლელად აუცილებელია გეზი ავიღოთ ქ. ქუთაისიდან ტყიბულის მიმართულებით. მანძილი ქუთაისის ცენტრალური მოედნიდან გელათის სამონასტრო კომპლექსამდე შეადგენს 8,5 კმ-ს. ფოტო გალერეა

X საუკუნის მოწამეთას ეკლესია მდებარეობს ტყიბულის მუნიციპალიტეტი, სოფ. მოწამეთაში. მისასვლელად აუცილებელია გეზი ავიღოთ ქ. ქუთაისიდან ტყიბულის მიმართულებით. მანძილი ქუთაისის ცენტრალური მოედნიდან მოწამეთას ეკლესიამდე შეადგენს 6 კმ-ს. ბოლო 500 მეტრიანი მონაკვეთის გასავლელად აუცილებელია მანქანიდან ჩამოსვლა და ფეხით სიარული.

XI საუკუნის ბაგრატის ტაძარი მდებარეობს ქ. ქუთაისში. ძეგლი იუნესკოს (UNESCO) მიერ არის დაცული, როგორც მსოფლიო მემკვიდრეობის უბანი. მისასვლელად აუცილებელია წითელი ხიდიდან გეზი ავიღოთ „გორა“-ს დასახლებისაკენ. მანძილი წითელი ხიდიდან ტაძრამდე შეადგენს 1 კმ-ს.